Cartref » Yr hyn a wnawn » Gweithio gyda Llywodraeth Cymru a’r Cynulliad » Beth all Uwchgynhadledd y Ddaear ei wneud dros Gymru?

Beth all Uwchgynhadledd y Ddaear ei wneud dros Gymru?

Ym mis Mehefin 2012, daeth arweinwyr byd ynghyd i ail-gadarnhau eu hymrwymiad i ddyfodol cynaliadwy i’n planed yn uwchgynhadledd Rio+20.

Gwyliwch ein fideo 5 munud isod i ddarganfod pa effaith mae uwchgynadleddau blaenorol wedi'u cael yng Nghymru neu cliciwch yma i ddarllen yr adroddiad.

 
Eleni, mae WWF Cymru wedi bod yn ymchwilio i sut y cafodd Uwchgynadleddau blaenorol y Ddaear – Rio 1992 a Johannesburg 2002 – effaith yng Nghymru. Rydyn ni wedi bod yn siarad â phobl a fu’n cymryd rhan mewn prosiectau i wneud Cymru’n fwy cynaliadwy, o wleidyddion i bobl ifanc a gynrychiolodd Gymru ar lwyfan y byd.

Credwn bod yn rhaid i Gymru ailddarganfod y brwdfrydedd dros gynaliadwyedd a ysgogwyd gan yr uwchgynhadledd wreiddiol yn 1992. Rydym eisiau Lywodraeth Cymru i gyflwyno cyfraith gref ar ddatblygu cynaliadwy er mwyn y blaned a chenedlaethau’r dyfodol.

Edrych nôl – effaith uwchgynadleddau blaenorol

 

Rydym ni wedi comisiynu adroddiad newydd - 'Beth all Uwchgynhadledd y Ddaear ei wneud dros Gymru?' - a ysgrifennwyd gan Dr Alan Netherwood a Dr Andrew Flynn.

 Mae’r adroddiad, a gomisiynwyd gan WWF Cymru, ac a ysgrifennwyd gan Dr Alan Netherwood a Dr Andrew Flynn, yn datgelu sut y bu i Uwchgynadleddau’r Ddaear ddylanwadu ar wleidyddion, sefydliadau a’r cyhoedd yng Nghymru, gan baratoi’r ffordd am ddyletswydd y Cynulliad i lunio Cynllun Datblygu Cynaliadwy a Bil Datblygu Cynaliadwy Llywodraeth Cymru. Fodd bynnag, mae’r adroddiad hefyd yn rhybuddio bod yna fwlch o hyd rhwng y broses a’r cyflawniad.

Mae’r cerrig milltir allweddol ym maes cynaliadwyedd ers uwchgynhadledd 1992 yn Rio yn cynnwys:

• 1998 – Datblygu Cynaliadwy’n cael ei wreiddio wrth sefydlu Cynulliad Cymru fel rhan o Ddeddf Llywodraeth Cymru
• 2002 – Rhodri Morgan yn mynd i Uwchgynhadledd Johannesburg, datblygiad pwysig wrth i Gymru gael ei chynrychioli ar lwyfan y byd
• 2008 – Cymru’n dod yn genedl Masnach Deg gyntaf y byd
• 2009 – Aelodau Cynulliad yn pleidleisio’n unfryd i leihau allyriadau 40 y cant erbyn 2020 o’u cymharu â llinell sylfaen 1990
• 2011 – Llywodraeth Cymru’n cyflwyno tâl o 5 ceiniog ar fagiau siopa untro

Gallwch gael gwybod mwy o'r astudiaethau achos hyn o bobl o Gymru y mae’r uwchgynadleddau wedi effeithio ar eu bywydau.

• Kirsti Davies, Canolfan y Dechnoleg Amgen, Machynlleth
• Alun Evans, Athro yn Ysgol Gyfun Llanhari yn Rhondda Cynon Taf
• Rhys Davies, Cynghorydd ar Drafnidiaeth Gynaliadwy, Canberra, Awstralia

Islwythwch yr adroddiad llawn (PDF)

Beth all Uwchgynhadledd y Ddaear ei wneud dros Gymru?