Rhoi yn awr
Cartref » Yr hyn a wnawn » Gweithio gyda Llywodraeth Cymru a’r Cynulliad » Cynhadledd gwelwdigaeth Un Blaned 2011

Cynhadledd gwelwdigaeth Un Blaned 2011

Bil datblygu cynaliadwy yn addo arweinyddiaeth gan Lywodraeth Cymru

Wrth annerch cynhadledd WWF Cymru yng Nghaerdydd yn ddiweddar, cyhoeddodd Gweinidog yr Amgylchedd a Datblygu Cynaliadwy, John Griffiths AC, ei ymrwymiad personol i gynnig deddfwriaeth newydd i gryfhau dyletswydd Llywodraeth Cymru ar ddatblygu cynaliadwy a’i hestyn i’r sector cyhoeddus.

Meddai’r Gweinidog:

"Bydd y ddeddfwriaeth rydym yn ei chynnig yn helpu i hyrwyddo ein huchelgais i Gymru fod yn genedl gynaliadwy, un blaned, a bydd yn adeiladu ar y cynnydd sylweddol a wnaethpwyd gan y weinyddiaeth ddiwethaf.
 
"Bydd angen rhoi sylw manwl i eiriad y ddeddfwriaeth, ac rydyn ni angen i bobl o bob rhan o’r agenda datblygu cynaliadwy gymryd rhan er mwyn i ni gael hyn yn iawn.
 
"Rydym wedi ymrwymo i fwrw ymlaen â’r agenda datblygu cynaliadwy a nodwyd yn Cymru’n Un: Cenedl Un Blaned a bydd y ddeddfwriaeth rydym yn ei chynnig yn bwysig eithriadol er mwyn i ni sicrhau gwell ansawdd bywyd i bobl Cymru heddiw ac yn y dyfodol."

Croesawodd Anne Meikle, Pennaeth WWF Cymru, gyhoeddiad y Gweinidog. Dywedodd:

“Y neges o’n cynhadledd Cymru Un Blaned oedd bod yna frys i fynd i’r afael ag agenda heriol lleihau ôl troed carbon Cymru a sicrhau bod cynaliadwyedd yn cael ei sefydlu’n gadarn ar draws pob maes yn y llywodraeth a’r sector cyhoeddus. Dangosodd y siaradwyr, oedd yn cynnwys rhai ymysg y mwyaf blaenllaw yn y byd ym meysydd gwyddoniaeth yr hinsawdd a thueddiadau mewn adnoddau byd-eang, ei bod yn hollbwysig i’r Llywodraeth gyflawni hyn yn y pum mlynedd nesaf.

“Mae WWF Cymru’n croesawu ymrwymiad y Gweinidog i greu bil datblygu cynaliadwy i Gymru gan y byddai hyn yn dangos arweinyddiaeth ym maes cynaliadwyedd.”

Roedd y Gweinidog yn siarad yng nghynhadledd WWF Cymru ddoe, oedd yn dwyn ynghyd arbenigwyr blaenllaw megis y gwyddonydd hinsawdd Syr John Houghton, Will Day, Peter Roderick, a Peter Davies, Comisiynydd Dyfodol Cynaliadwy. Edrychodd y gynhadledd ar heriau’r newid yn yr hinsawdd a phrinder adnoddau, a’r cyfleoedd i sicrhau cynaliadwyedd yng Nghymru.

Bu WWF Cymru yn lansio ei adroddiad, ‘Embedding the ‘One Planet’ Aspiration in Welsh Government 2011’, sy’n nodi sut y gall Llywodraeth Cymru gyflawni ei hymrwymiadau beiddgar i Gymru wyrddach. Canfu’r adroddiad fod Llywodraeth Cymru wedi ‘wedi mynd ati mewn ffordd ganmoladwy’ i fynd i’r afael ag ‘olion traed’ ecolegol a charbon Cymru ond bod y pum mlynedd nesaf yn ‘hanfodol’ i’r gweinidogion newydd gyflawni’r nod hwnnw.

Meddai Anne Meikle:

“Mae angen i ni ddod â phob rhan o’r gymdeithas gyda ni wrth wneud Cymru’n genedl gynaliadwy, nid dim ond y sector cyhoeddus. Dyna pam rydyn ni’n pwyso ar y llywodraeth i ailedrych ar ei chynlluniau ar gyfer datblygu economaidd i sicrhau eu bod yn canolbwyntio ar gynorthwyo busnesau Cymru i gyflawni economi carbon isel, a pham mae angen i ni gael tai ynni-effeithlon ledled Cymru gyfan. Mae’r her o ran y newid yn yr hinsawdd sy’n ein hwynebu’n glir, a thrwy weithredu gallwn adeiladu dyfodol lle bydd pobl a natur yn ffynnu.”

Talodd y Gweinidog deyrnged i waith WWF Cymru hefyd. Dywedodd:

“Mae gwaith WWF Cymru wedi bod mor bwysig wrth osod yr agenda a meithrin trafodaeth ynghylch datblygu cynaliadwy. Sbardunodd gymaint o weithgarwch yr ychydig flynyddoedd diwethaf a llywiodd yr hyn a fabwysiadwyd gan y Llywodraeth mewn gwirionedd.”

Nododd y llywodraeth ddiwethaf ei gweledigaeth ‘Un Blaned’, o Gymru’n defnyddio ei chyfran deg o adnoddau’r ddaear yn unig. Ar hyn o bryd, pe bai pawb yn y byd yn byw fel yr ydyn ni yng Nghymru, bydden ni angen rhyw ddwy blaned a hanner i’n cynnal.

Gwyliwch fideos byr o'r Gweinidog a Pennaeth WWF Cymru, Anne Meikle, yn egluro eu gweledigaeth nhw am Gymru Un Blaned.